द्यो वरदान मुझे भक्ति का, जागो शंकर बम लहरी |
अन्न धन का भण्डार खोल दे , सेवा करा मालिक थारी ||
अंग वभुती ललाट चन्द्रमा, मुंडीयन कि माला पहरी |
बासुकी नाग गले बिच टूले, शीश जटा गंगा बह री || १ ||
गांजा सुल्फा आक धतुरा, नशा करे शंकर जहरी |
अमल तम्बाकू भांग छूतरा, प्याय रही गौरा प्यारी || २ ||
भक्ति से वरदान ले लियो, तपस्या जाय करी गहरी |
भष्मी कड़ो दियो दानव ने, शिव के गेल हुयो बेरी || ३ ||
आगे शंकर लेरा दानो, देणे लग्या खंड के फेरी |
गिरिजा रूप धरयो विष्णु ने , दाने कि करदी ढेरी || ४ ||
दस शीष रावण ने बक्श्या, बीस भूजा हस्ती गहरी |
विजयी का वरदान पायके, राम तणी सीता ने हरी || ५ ||
काशी चेला शिवशंकर का, पार करो उनकी बेरी |
पलक उघाड़ो अन्तर्यामी , सुवरण का पासा गेरी ||६||
झिलळ झिलळ वालो कुम्भलावे, आवण कि मत कर देरी |
रामजीलाल बिडद बखाने, सुन भोला करुणा मेरी || ७ ||
कोई टिप्पणी नहीं:
एक टिप्पणी भेजें